අභිමානයෙන් උසස් බාලිකාවක් වූවෙමි

ලස්සනට ඉර පායලා තියන ලස්සන දවසක ,අලුත් ඉස්කෝලෙට යන්න අම්මයි මමයි පිටත් වෙනවා .ඉස්කෝලෙන් එවලා තිබුණ ලිපියට අනුව මහපු ලස්සන කොලර් එකක් , ලස්සන සාක්කු දෙකක් තියන ලස්සන සුදු රැලි ගවුම ඇඳලා , කොටට කපල තියන කොණ්ඩේ පීරලා සුදු බෝ එකක් ලස්සනට ගහල , අලුත් සපත්තු ,මේස් දාලා , අලුත් සුවඳ විසිරෙන අලුත්ම පොත් , පෑන් , සහ පොත් පිරුණු අලුත් බෑග් එක උජාරුවෙන් පිටේ එල්ලගෙන , සැබෑ වෙන හීනයක පාට අතරෙන් හරිම පොඩියට අම්මගේ අතේ එල්ලිලා ගාම්භීර මහනුවර නගරේ , ඒ අභිමානවත් අලුත් ඉස්කෝලේ ගේට්ටුවෙන් ඇතුල් වෙනවා ..

GIRLS ' HIGH SCHOOL KANDY ඊයම් පාටින් ගේට්ටුවේ වම් පැත්තේ බිත්තියේ පුවරුවක ලස්සනට ගහල තියනවා .අභිමානය , වගේම හරිම උසස් බවකුත්  රැදුණු ඒ අකුරු දැකලා  මගේ හිත සන්තෝසෙන් පිරෙනවා  ..'' මම දැන් අලුත් ඉස්කෝලේ ''.. එක එක සතුටු සිතුවිලි මගේ හිතට ගලා ගෙන එනවා. ගේට්ටුවෙන් ඇතුල් වෙලා දකුණු පැත්තේ පහල තියන Net Ball court  එකත්  , ඊට කෙලින්ම ඉස්සරහ තියන CONSTANCE MALLET  HALL  කියල  ලොකු අකුරින් ගහල තියන ලොකු ගොඩනැගිල්ලත්  බලා ගෙන අම්මයි මායි දිගටම යනවා ..

එහෙම යනකොට තව අලුත් ළමයිත් හම්බ වෙනවා .. අම්මල තාත්තලත් එක්ක ..එයාල ඔක්කොම ලොකු අරුක්කුවක් ඇතුලෙන් යනවා . අම්මත් මාත් ඒ අයටම එකතු වෙනවා .. ආරුක්කු හැඩේට නිම කරපු ඒ මාර්ගේ යනකොට බිත්ති දෙපැත්තේ ගහල තියන වීදුරු රාමු තියන විවිධ විවිධ දැන්වීම් පුවරු මට පේනවා. එක එක සංගම් වල .. එක එක දේවල් .. ළමයින්ගේ ලස්සන නිර්මාණ .. පෝස්ටර් .. මට ඔක්කොටෝම ආස හිතෙනවා ..'' කලින් ඉස්කෝලේ මෙහම නෑ .. ඔක්කොම දේවල් එකම තැනක හරි ලස්සනයි '' ඒවා බලල මම හිතනවා ..

අරුක්කුව කෙලවර ලස්සන එලිමහනක් .. ලස්සන මල් වැටක් එක්ක ඉදිවුණු දිග සිමෙන්ති බැංකු දෙකක් පාර දෙපැත්තේ .. පාරේ දකුණු පැත්තේ විසාලෙට වැඩුණු ගස් හෙවනක ඉදිවුණු හට් එකක් අස්සේ නිලුයි සුදුයි ඉරි තියන ලොකු බස් එකක් ආඩම්බරෙන් නැවතිලා ඉන්නවා .. එකේ ඉස්සරහ ඉස්කෝලේ නම ගහල තියනවා .. මට ඒකටත් ආස හිතෙනවා .. ''හරි ෂෝක් අලුත් ඉස්කෝලෙට බස් එකකුත් තියනවා '' මට හිතෙනවා වැඩිවෙන සතුට අස්සෙන් ..

තව ඉස්සරට යනකොට් අහසට විහිදුනු ලොකු ගොඩනැගිලි පාර දෙපැත්තේ , මල් වැටවල් .. බලන්න ආස හිතෙනවා .. දකුණු පැත්තේ ගොඩනැගිල්ලේ යට තට්ටුවේ ශාලාවක අලුත් ළමයි භාර ගන්නවා .. සෙනග පිරිලා .. අම්මත් , මමත් සෙනගට එකතු වෙනවා ..ශාලාවේ දොර ළඟ ගුරුතුමියක් ඉස්කෝලෙන් එවපු ලිපිය අම්මගේ අතෙන් අරන් බලල එකේ සඳහන් අංකයට අනුව , එයා ළඟ තියන ලේඛනේක මගේ නම හොයනවා ..

''නෙලුම් දසනායක හරි .. ඔයා 6-B පන්තියේ .. ''
''අර කොනේ දෙවනියට තියන මේසේ ඉන්නේ ඔයාගේ මැඩම් ''
''එතනට ගිහාම ඉතුරු වැඩ කරයි ''

මාත් , අම්මත් දිහා බලාගෙන ඒ ගුරුතුමී හිනා පුරවාගෙන කියනවා

අපි ඒ මෙසේ ලඟට යනවා . අලුත් ළමයිනුත් අම්මල . තාත්තලත් දිග පෝලිමක් එතන .. ටිකක් කලබලයි .. සද්දයි ..අපිත් පෝලිමට එකතු වෙනවා ..
මගේ ළඟම ඉස්සරහ කොණ්ඩ පොකුරු දෙකක් බැඳලා ඉන්න යාලුවෙක් ඉන්නවා .. එයා මට හිනා වෙනවා. මාත් එයාට හිනා වෙනවා .. එයා ඉන්නේ අම්මගෙත් , තාත්තගෙත් මැද්දේ ..
''ඔයාගේ නම මොකද්ද ?? ''මම අහනවා
''කෝසලා '' එයා කියනවා '' ඔයා?? ''එයා මගෙන් අහනවා
''මම නෙළුම්'' ..  මම කියනවා ..
අලුත් ඉස්කෝලේ පළවෙනි යාළුවා මට හම්බවෙනවා .. මගේ සතුට වැඩි වෙනවා .
ඒ අතරේ කෝසලාගේ  අම්මයි , තාත්තයි බර කතාවක් පටන් අරන් අපේ අම්මත් එක්ක ..

මාත් කෝසලත් , ගම , හිටපු ඉස්කෝලේ වගේ දේවලුත් කතා කර ගන්නවා ..සතුටු සිනා අපි දෙන්නගෙම මුණු වල .
ඒ අතරේ තව යාලුවෙක් අපිට එකතු වෙනවා .
කොණ්ඩේ කොටට කපල ඉන්න එයා මට වඩා ටිකක් උසයි ..
අපි දෙන්නම එයාට හිනා වෙලා කතා කරනවා ..
එයාගේ නම ප්‍රබෝදිනි  කියල කියනව ..ඔහොම මට තවත් යාලුවෙක් හම්බ වෙනවා ..

ටිකෙන් ටික පෝලිම ඉස්සරහට ගිහින් .. මෙසේ ළඟ කොණ්ඩේ කොටට කපපු මැඩම් කෙනෙක් හිනා වෙලා මගේ දිහා බලනවා ..
ඇතුලත් වීමේ ගාස්තු ගෙවන්න කොළ කීපයක් අම්මට දෙන ගමන් එයා මෙහම කියනවා
''මේ list එකේ තියන බඩු ටික ඉස්සරහා  tunnel එකට වම් පැත්තේ තියන co -operative shop එකෙන් අරන් දෙන්න ..දැන් admission fee එක ගෙවන්න ''
කැරලි කැරලි කොට කොණ්ඩේ තියන ඒ ගුරුතුමීට මට ආස හිතෙනවා .. කලින් ඉස්කෝලේ කොට කොන්ඩේ  තියන මැඩම්ලා හිටිය නැති වග මට මතක් වෙනවා ..

අම්මා අදාළ ගෙවීම් කරනවා ..ඒ අතරේ මැඩම් කියපු list එක අරන් මම බලනවා ,
Tie , School Badge,House Badge, Hand book, ඔය වගේ දේවල් එකේ තියෙනවා . අලුත් දේවල් ගොඩක් ලැබෙන්න යන නිසා ඒක කියවන අතරේ මට තව සතුටු හිතෙනවා ..
ටික වේලාවකින්ම භාර ගැනීමේ වැඩ ඉවර වෙනවා .. අපි පෝලිමෙන් ඈත් වෙලා කෝසලත් , ප්‍රබෝදනිත් ගෙවීම් කරලා එනකන් පසෙකට වෙලා ඉන්නවා ..

හැමෝම එක්ක Co -operative shop එක හොයාගෙන යනවා .. කලින් අපි ආපු ආරුක්කු මාර්ගෙන් ආපහු එලියට ආවම දකුණු පැත්තෙන් ඒක අපිට හම්බ වෙනවා ..
ඇතුලට ගිහින් අදාළ බඩු ගන්නවා .. එකේ වැඩ කරන කොට , මහත, ටිකක් තලෙළු, තොල් සායම් ගාපු , මැදි වියේ කාන්තාවක් ලහි ලහියේ බඩු දෙනවා .
''එයා නම් සැර පාටයි '' එයාගේ මුණ බලලා ,අම්මා බඩු ගන්න අතරේ මට හිතෙනවා (පස්සේ කාලේ ඉස්කෝලේ හුරු උනාම  එයාට Co -op එකේ අක්කි / ''කෝපාවති '' කියන වෙනත් නමුත්  තියන බව අපි දැන ගත්තා )

අම්මා බඩු අරන් මගේ අතට දෙනවා ..
ලංකාවේ වගේම ලෝකෙන්ම ලස්සන ටයි එක මට ලැබෙනවා ...
ඇහැට දැක්කම ආස හිතෙන හරි සෞම්‍ය පාට හතරක ඉරි පිරිච්චි ටයි එකක් ..
තද නිල් , ලා නිල් , කොළ , කහ හරි ලස්සනයි . ''ලස්සන රටාව ''මම හිතනවා .
ඒක අතට ගත්තම ලෝකෙම අභිමානය මට දැනෙනවා ..
හිත සතුටෙන් පිම්බෙනවා .අම්මා සීරුවෙන් ටයි එක මගේ කරට දාල , ගැටේ ගහල කොලර් එක හදනවා .. කරට දාගත්තම මගේ අභිමානය තව වැඩි වෙනවා ..

ටයි එක මැදින් ලස්සන School Badge එක අම්මා ගහනවා ..තණකොළ පිරුණු කොළ පාට තණ බිමක් , ඒ එක්කම නැගුනු නිල් පාට විශාල කන්දක් , ඊට පිටු පසින් රන් පාටින් බබලන ඉරත් එක්ක ලා නිල් අහස එකේ තියනවා .. ඒවත් ටයි එකේ තියන පාට . මම අඳුන ගන්නවා ..
A DEO AUXILIUM  කියල එකේ යටින් ගහලා තියනවා .. එකේ තේරුම මට නොතේරුණත් ආසාවෙන් ඒක මම කියවනවා ..

ඊට පස්සේ House Badge එක .. මම අයිති වෙලා තිබුනේ ඊට්න් (EATON ) house එකට  නිසා අහසේ ලස්සන ලා නිල් පාටින් බැබලෙන ඒ ලස්සන badge එක වම් කොලර් එකේ අම්මා ගහනවා .ඒ වෙලාවේදීම මුළු ජීවිතේටම මගේ ආසම පාට ''ලා නිල් '' කියලා මම හිතා ගන්නවා .
 කෝසලා ලස්සන කොළ පාට badge එකක් ගහගෙන එයා අයිති ලැන්ඩන්(LANGDON )  house එකට  .
ප්‍රබෝදනිට ලැබිලා තිබුනේ තද නිල් badge එකක් . එයා සැන්සම් (SANSOM )house එකේ ..කහ පාට නැත්තම් රත්තරන් පාට අනික් house එක ලෝරන්ස් (LAWRANCE ) කියල එවෙලේම අපි හොයා ගත්තා .

ලස්සන ටයි BADGE  ගහල අපි හැමෝම ලස්සනට ලෑස්ති වෙලා 6-B  පන්තියට ගියා ..පේලි පේලි ලස්සන DESK පුටු පිරිලා .. කලින් ඉස්කෝලෙට වඩා වෙනස් මේ ඩෙස්ක් වල පැත්තෙන් පොත් දාන්න පුළුවන් කොටුවකුත් තියනවා  ඒදැකලා ඒකටත් මට ආස හිතෙනව.

ටික ටික ළමයි පිරෙන ඒ ඩෙස්ක් පුටු අස්සෙන් ගිහින් , මාත් , කෝසලත් , ප්‍රබෝදනිත් වාඩි වෙනවා .. අලුත් මුණු සතුටින් පිරිලා හැම තැනම ..අම්මල , තාත්තලත්  ළමයි ළඟම  තෙරපි තෙරපි ...
ඉස්සරහ පේලියේ යුගාන්ති , දුලංජලී , පූර්ණිමා අපිත් එක්ක යාලු වෙනවා .. තව තව යාලුවෝ ගොඩක් එකතු වෙනවා .. ටික වෙලාවකින් පන්තියම පිරුණම කලබලේ වැඩි වෙනවා ..

ඒ එක්කම පන්ති භාර නන්දා බණ්ඩාර මැඩම් ඇවිත් අම්මලා , තාත්තලට එළියට ගිහින් MAIN HALL එකේ දේශනෙකට යන්න කියලා ,පරණ ඉස්කෝලේ විදිහටම ''ආයුබෝවන් ළමයි ''කියලා  හිනා පොකුරු ඉසිමින් අලුත් අපි හැමෝම  ඇගේ උණුසුම් තුරුල්ලට ගන්නවා .. අපි හැමෝමත් පමාවක් නැතුවම  ලෝකයෙන්ම උසස් , ඒ උසස් බාලිකා මව් තුරුල්ලට , අභිමානයත් , සතුටත් හිතේ පුරවගෙන , ''ආයුබෝවන් මැඩම් ''කියලා තුරුළු වෙනවා ....