සූර්යයා අහසේ නැඟ බැස ගියේය , චන්ද්‍රයා අහසේ නැඟ බැස ගියේය .එලෙසම කාලයද ගෙවී ගියේය .වන පොත් කොට සුදානම්ව සිටියද ,බුත්සරණියට ගුරු මෑණියන් හමුවේ මොහොසම් රෝගී තෙම පිළිබඳව තතු දක්වන්නට අවස්ථාවක් නම් එළබුනේ නම් නොවේ , මන්දයත් ගුරු මෑණියෝ එම රෝගී තත්වය ජීවක සිසුන්ට නම් තරම් නොවේ යැයි සිතා මඟ හැර යාමය .එසේ හෙයින් කාලය ගෙවී යන මත්තේ බුත්සරණියද නොවළහා සැනසුම් සුසුම් හෙළපියාවුය .
පෙර දිනයක ගුරු මෑණියන්ගේ බස් අසා සිත් පුබුදුවා ගත් ජීවක සිසුහු , පමාවක් නොදක්වාම පොත පතේද , රෝගීන් විචාරීමෙහිද ඇලුනා වූ නිසාවෙන් ගුරු මෑණියන් හමුවේ මනා දස්කම් දක්වන්නට භාග්‍යවත් වුහ , ඒ දැකුම් හමුවේ ගුරු මෑණියද ප්‍රමුදිතව ,ඩෙංගු නම් උණ සන්නිපාත රෝගයට ,දශම නමයක් ලුණු ඇත්තා වූ ඒ මහාර්ඝ දියරත් ,වෙනත් දියරත් , රෝගය උත්සන්න විටක රුධිරය මඳ වී මිය යා හැකි අක්මාව රැක ගැනීම වස් රුධිරයත් ,ලබා දෙන අයුරු ද , අක්මා රෝගීන් රැක බලා ගන්නා අයුරුද ගුරු පඬුරු තබා නොගෙනම සියලු සිප් ලබා දුන්නාය.
මෙකි යහපත් කල්ක්‍රියාවෙන් සිසුන් වසන කල්හි ,චල පියදස්සනී නම් , මොණර පිලක් වන් දිගු කෙස් කලඹක්ද, මුතු ඇට වන් දත් දෙපෙලක්ද , පෘථුල වූ නළල් තලයක්ද හෙබි වූ දුටුවන් මන බඳවන රූ සපුවක් මෙන්ම , මහා නුවනක්ද හිමි ජීවක සිසුවියට , මුත්‍රා පහ කිරීමේ අපහසුවක්ද , බඩේ රුජාවක් මෙන්ම උණ සන්නිපතයද වැළදුණු රෝගියෙකු භාර විය .
ඉදින් දිනක් ගුරු මෑණියෝ මෙම රෝගියා විචාරන අතර , රෝගියාගේ මුත්‍රා පිළිබඳ පරීක්ෂණ පත්‍රිකාව ,දක්වන්නැයි සීමාවාසික ජීවක තැනට සැල කළාය .
එබස් අසන ඕ මෙසේ කියත්
''ගුරු මෑණියනි , මුත්‍රා පරික්ෂාවට අදාල නියැදි ලබාගෙන , මම පෙර දිනයේ විද්‍යාගාරයට ලබා දුන්නෙමි , එනමුදු වාර්තාව මෙතකුදු සුදානම් නැත්තේය ''
''එය නම් මහත් පමාවකි , අදාළ වාර්තා නොමැතිව ඖෂධ නියම කිරීමෙන් පලක් නැත්තේය , වහා වාර්තා ලබා ගත යුතුය .'' ගුරු මෑණියෝ කියන්නට විය .
ඉන් මත්තෙහි සිසුන් දෙසට හැරී ''මේ රෝගියා නම් කාගේද ??'' සුපුරුදු පැන විමසන්නට වුවාය .
ඉදන් ගම්‍ය වන්නේ චල පියදස්සනී හැර අන් කවුරුද , ඈ දෙස තියුණු බැලුම් හෙලන ගුරු මෑණියන් හමුවේ , ඕ සිහින් හඬින් මෙසේ කියන්නට වුවාය ,
''ගුරු මෑණියනි රෝගියා නම් මාගේය ''
''එසේ නම් මෙම රෝගියාගේ වාර්තා සුදානම් දැයි , තොප වහා ගොස් , දුර සිට ඇමතිය හැකි කථනය භාවිතා කොට , විද්‍යාගාරය අමතා , තතු සොයා වහා විත් මා හට සැල කර සිටුව යැයි කීවාය ''
''එසේය ගුරු මෑණියනි '' කියා චල පිය්දස්සනී , කථනය සොයා පා නැගුවාය ,ඒ අසල නැවතී .පෙර මෙසේ අමතා පුරුදු මඳ වුවේන් , හෙද මණ්ඩලයේද සහය ඇතිව කෙසේ හෝ විද්‍යාගාරය අමතා තතු දැන ගෙන වහා නැවතත් ගුරු මෑණිය අභිමුඛයට ඇසිල්ලකින් පිය මැන්නාය .
මෙසේ කියන්නට වුවාය
''විද්‍යාගාරය වෙත එවන් මුත්‍රා නියැදියක් , පරික්ෂාවට ලැබී නැති බැව් සැලකල සිටියේය ගුරු මෑණියනි ''
ඒ බස් අසා මවිතව , ගුරු මෑණියෝ සීමාවාසික ජීවක තෙම කෙරේද සැක මුසු බැලුම් හෙලමින් මෙසේ කීවාය .
''එසේ නම් යම් වැරද්දක් සිදු වී ඇත්තා සේය, එය සෙවීමට නම් කල් නැත්තේය , එසේ හෙයින් නැවතත් නියැදි ලබා ගෙන පරික්ෂාවට යැවිය යුතුය .''
''දරුව මේ රෝගියා නම් භාර තොපය , එසේ නම් තොප වහ වහා රෝගියාගෙන් මුත්‍රා නියැදියක් ලබා ගෙන , අදාල පත් ඉරු සම්පූර්ණ කරගෙන , තොප අතින්ම විද්‍යා ගාරයට ගෙනගොස්, පරික්ෂාව කරන තුරු එහිම රැඳී සිට , වාර්තා ලබාගෙන හැකි ඉක්මනින් වහා පැමිණෙව ''
එබසට අවනතව චල පියදස්සනී , හෙද මණ්ඩලයේ සහයෙන් , මුත්‍රා නියැදි ලබා ගැනීමට බෝතල් කුප්පියක්ද සොයා ගෙන , රෝගියාද පෙරටු කොට ගෙන කැසිකිලි වෙත පා නැගුවාය ..
ඉතිරිය මතුවට .....
No comments:
Post a Comment