මනු සත් දෙරණ

මේක මගේ කතාවක්  නොවුනත් , ලංකාවේ කොන්  වල ඉන්න අපේම අහිංසක මිනිස්සු කොටසක් වෙනුවෙන් , ජනප්‍රිය වගේම Premium Entertainment Channel  කියලා හදුන්වා ගන්නා , දෙරණ මාධ්‍ය ජාලය   විසින් කරපු අපුරු යුග මෙහෙවරක් ගැන මෙහම ලියන්නේ  මගෙනුත් වෙන්න තියන වගකීමක් පොඩියට හරි ඉටුකරන්න හිතාගෙන ..මේක කියවන කෙනෙක්  හිතාවි  ඉතින් මම දෙරණට කඩේ යනවා කියලා , එහෙම හිතුවත් කමක් නෑ, මොකද   මේක නිදහස් රටක් නිසා ඕන දෙයක් ඕන කෙනෙක්ට කියන්න පුළුවන් .. එත් ඉතින් මම මේ ඇත්තටම කඩේ යන්නේ අහිංසක මිනිස්සු කොටසක් වෙනුවෙන් බවත් එයාලට කියන්න කැමතියි .

හරි කතාව මේකයි , ඔන්න වැඩිය tv බැලුවේ නැතත් සෙනසුරාදා ,(2/11/2013) දෙරණේ අපුරු ඇඩ් එකක් මම දැක්කා . ''සියල්ලට ප්‍රථම මනුස්සකම ''කියලා පටන් ගත්ත ඒ ඇඩ් එකෙන් කිව්වේ , අපේ රටේ රජරට , කුරුණෑගල , මුලතිව් , හම්බන්තොට  වගේ ප්‍රදේශ වල සීග්‍රයෙන් පැතිරෙන වකුගඩු රෝගය පිළිබඳව ,මහා දැනුවත් කිරීමේ වැඩසටහනක් , උදෑසන 10 සිට හවස 7 දක්වා අඛණ්ඩ පැය නවයක් සජීව වැඩසටහනකින් කරනවා කියලා .. ඒක දැකපු ගමන් මට මාර පුදුම හිතුනා , ''අහ්හ්  පැය  9 ක්  , ගොඩක් වෙලානේ ''...මොන channel එකක්වත් එහෙම කරලා නෑනේ කලින් .. ඇරත් ඒක film festival එකක් වත් වෙන මොන නැටුමක් වත් නෙවෙයි  දැනුවත් කිරීමේ වැඩසටහනක් .. අපිත් ඉතින් com-med වලට කොච්චරවත් ඉගන ගන්නවනේ Health Education ගැන .. අර පහුගිය විභාගෙටත් පිටු පිරෙන්න ලිව්වෙත් ඕකනේ , ඉතින් මේක නම් බලන්න ඕනේ කියල හිතා ගත්තා .

ඔන්න ඉරිදට එලිවුනා , මාත් ඉතින් කරන්ඩ කියල වැඩක් පලක් නැති හින්දා (ගෙදර අස් කිරීම වගේ  බොහෝ වැඩ තිබ්බත් ) උදේ ඉදන්ම අතටම හම්බවෙන කෑම බීම කකා මුණු පොතෙයි , utube  එකෙයි එල්ලිලා හිටියා .. වෙලාව ගිහින් .. අම්මගේ බැනුම් අස්සෙන් නැගිටලා එද්දී 12 වෙලා . ඇවිත් ඉතුරු ටිකට tv එක දැම්මා .. අහ් අර program එක .. මට මතක් වෙලා දෙරණ දැම්මා

මෙන්න ඒක යනවා ,, සබීතා පෙරේරායි , ගීතා කුමාරසිංහයි , නිවෙදිකවකුයි , නිවේදකයෙකුයි  බරටම කතාව . ඒගොල්ලෝ රජරට වකුගඩු රෝගය ගැන එක එක අදහස් කියනවා .. ආර්සනික්  කියනවා . කිවුල් වතුර කියනවා . දුක් විදින මිනිස්සු කියනවා . පරීක්ෂණ වලට සල්ලි නෑ කියනවා .. අපේ ජාතික වගකීම කියනවා .. අපි එකතු වෙලා මුදලක් රැස් කරලා ඒ අයට උදවු කරන්න ඕනේ කියනවා .

මාත් ඉතින් toxicology වලට අනුරුද්ධි මැඩම් අපිට ගොඩක් මහන්සි වෙලා උගන්නපු නිසාත් , විභාගෙට පවා ආර්සනික් ගැන ලියපු නිසාත් , එයාල කියන දේවලුත් මගේ දැනුමත් එකතු කරමින් අහගෙන ඉන්නවා .

ඒ අතරින්ම video එකක් පෙන්නනවා , ඒ රජරට රෝගීන් කීප දෙනෙක් .. අපි ආර්සනික් poisoning  theory වලට ඉගන ගත්ත rain drop lesions කියලා හදුන්වන , දුඹුරු පාට තිත් තිත්  ඒ රෝගීන්ගේ අල්ලේ , දෙපතුල් වල මට පේනවා , දුඹුරු පාට කොන්ඩේ එකත් හරි ,, ඇස් හොඳටම සුදු වෙලා ,, ඒ අය anaemic ,Hb 8 වත්  නැතුව ඇති .. ඇඟිලි වල නියපොතු සුදුම සුදුයි ... කකුල් ඉදිමිලා .. මුණු ඉදිමිලා .. chornic renal failure ලක්ෂණ (දිගුකාලින වකුගඩු අකර්මන්‍ය තාව )..

කොච්චර අහල , කියවලා තිබ්බත් මේ විදිහට දැකල තිබ්බේ නැති නිසා මට මගේ ගැන ලැජ්ජාවකුත් එක්ක අර රෝගීන් ගැන ගොඩක් දුක හිතෙනවා . පදවි ශ්‍රී පුර එක පවුලක 5 දෙනෙක්ම රෝගයට ගොදුරු වෙලා මියගිහින් , ඉතුරු වෙලා ඉන්න 65 හැවරිදි ශීලටත් රෝගය වැළදිලා . තව සීය කෙනෙක් අමාරුවෙන් නැගිටලා තමගේ පරීක්ෂණ වලට අනුරාධපුරේට යන්න 1500 වැය වෙනවා කියනවා .කටු මැටි ගහපු ගේක ඉන්න ඒ සීයට සල්ලි ඇතිද මට හිතෙනවා ..ඊට පස්සේ අවුරුදු 22 තරුණයෙක් '' මගේ වකුගඩු දෙකම වැඩ කරන්නේ 18% '' කියනවා ..ඒවා දකින අහන මට ගොඩක් දුක හිතෙනවා . අපි ඉන්නේ කොතනද ??
කියල හිතෙනවා ..

video එකෙන් පස්සේ හැඟුම් බර හඬකින් නිවේදිකාව , ''අපේ මේ උදාර ක්‍රියාව ඔවුන් වෙනුවෙන් අරමුදලක් පිහිට වන්න කියල ..'' අපේ දෙරණ ආයතනයෙන් ලක්ෂ 10 ප්‍රදානය කරනවා  කියල ,ලක්ෂ 10
තිරයේ දිස්වෙනකොට නිහතමානිව කියනවා .,, ඒ එක්කම දෙරණ සේවකයෝ තමන්ගේ  දිනක පඩිය අරමුදලට බැර කරනවා . එතකොට ලක්ෂ 13 තිරයේ වැටෙනවා ..
නිවේදකයා ඊට පස්සේ   ඔබටත් ඔබේ මුදල් ආධාර පහත ගිණුම් අංකයට බැර කිරීමට හෝ අපේ ආයතනයට පැමිණ ලබාදෙන්න පුළුවන් කියනවා .
ඒ එක්කම සබීතා මහත්මිය ලක්ෂයකින් දායක වෙනවා ..1000/2000/10000/ 50000 ඔය වගේ මුදලුත් ඉක්මනින්ම හිත උණු වෙන මිනිසුන් අතින් , ''මේක මාටියා ගහයිද , හොර කරයිද වගේ'' සිතුවලින් තොරවම අර අහිංසක මිනිස්සු වෙනුවෙන්ම , ඔවුන්ගේ පරික්ෂණ , dialysis machines වෙනුවෙන්ම උදාර පහන් සිතුවිලි වලින් දෙවරක් නොහිතාම අරමුදලට බැර වෙනවා ..

ඊට පස්සේ මැදිරියට  එන්නේ වෛද්‍ය පාලිත බණ්ඩාර( අනුරධපුර ප්‍රාදේශීය සෞඛ්‍යය අධ්‍යක්ෂ ස)හ පදවි ශ්‍රී පුර රෝහලේ වෛද්‍ය  චින්තක විජේවර්ධන .. ඔවුන් මෙම රෝගය පළමුවෙන්ම හඳුනා ගන්නේ 2002
වසරේදී බවත් , දැන් රෝගීන් සංඛ්‍යාව සීග්‍රයෙන් ඉහල යන බවත් කියනවා .
 මීට හේතු විය හැක්කේ භූගත ජලයේ ඇති කැල්සියම් ආසනේට් බව ඔවුන් තම පරීක්ෂණ වලින් සොයාගත් බවත් කියන අතරේ , රෝගය toxic nephropathy  එකක් බවත් , මෙහිදී interstitial nephritis තත්වයක් ඇති වන බවත් පැහැදිලි කරනවා . බටහිර වෛද්‍ය විද්‍යාවට අනුව මෙය සුව කල නොහැකි බවත් , Dialysis එහෙම නැත්තම් රුධිර කාන්දු කරණය මගින් තාවකාලිකව ප්‍රතිකාර කල හැකි බවත් සංවේදීව කියනවා .

ඒ අතරේ අරමුදලත් තර වෙනවා

ඊළඟට මේ සම්බන්ධව මුල සිටම ක්‍රියා කරපු අචාර්ය නලින්ද සිල්වා මහතා එනවා .මෙහි පැහැදිලි හේතුව ආර්සනික් බවත් , වහාම භූගත ජලය වෙනුවට වැව් වල මතු පිට ජලය බෙදා හරින ක්‍රමයක් ස්ථාපිත කල යුතු බවත් ,කෘෂි රසායනික වලින් තොර සාම්ප්‍රදයික වගා කටයුතු ලහි ලහියේ නැවත ඇති කල යුතු බවත් , බටහිර වෛද්‍ය විද්‍යාවේ නැති වුනත් සාම්ප්‍රදායික වෙද මහතුන් සතුව මෙම රෝගය සුව කිරීමේ ක්‍රම ඇති බවත් , හැම දාම වගේ සමාජයේ බටහිර ක්‍රිස්තියානි නුතනත්වයටත් එරෙහි වෙමින් අදහස් දක්වනවා .

කාලේ ගත වෙනවා , ඕෂදී හේවා මද්දුම , ටෙනිසන් කුරේ , BNS , විමුක්ති ජයසුන්දර , සංගීත් විජේසුරිය , වගේ කලා  ලෝකේ තරුත් ඇවිත් දැනුවත් කිරීමට එකතු වෙනවා , අතරින් පතර පැය කීපයක් ඇරෙන්න මාත් දිගටම වැඩසටහන බලනව.

ලක්ෂෙ / 50000 එක එක ගානින් අර මුදල තර වෙනවා ,ඒ අතරේ අත්තම්මා කෙනෙක් මුනුබුරත් එක්ක දෙරණ මැදිරි සංකීර්නේ ලඟින් අමාරුවෙන් ඇවිදන් යන ගමන් අරමුදලට සල්ලි දෙන මහා සෙනග මැද්දෙන් ඇවිත් අතේ තිබ්බ රුපියල් දහයක් දුන්න කියලත් , මෙහෙකාර සේවේ යෙදිලා ඉන්න කාන්ති මහත්මිය 13000 දුන්නා කියලත් , සිත් උණු වෙන අපේ ලංකාවේ මිනිස්සු ගැන ආඩම්බර වෙමින් නිවේදකයා කියනව .

මේ ඔක්කොම අස්සේ මේ මාසේ 17 මහවිලච්චිය රෝහලේ නොමිලේ පැවැත්වෙන සායනෙට ඇවිත් අදාළ පරීක්ෂාවන් කර ගන්න ලෙසටත් , අදාළ ජනතාවට පුන පුනා කියනවා ..කාලෙත් ගෙවිලා 7ට ලංවෙනකොට අරමුදල ලක්ෂ 43 වෙනවා .. අපේ ගෙදරිනුත් එක්තරා මුදලක් දාන්න ගෙදර අය කතා වෙනවා ..ඒ විදිහට දවස ගෙවෙනකොට ඒ අහිංසක මිනිස්සුන්ට බලාපොරොත්තු දෙන දෙරණ ගැන ආඩම්බරෙන් කතාව ලියලා මාත් සතුටු වෙන ගමන් ඔයාල හැමෝමත් ඒ අපේම ජනතාව , වෙනුවෙන් ඔයාලගේ වගකීම ඉටුකරයි , fb එකේ වල් පල් හොයන අස්සේ මේ ගැනත් කතා කරලා දැනුවත් කරයි කියලත් මම උදක්ම හිතනවා ..

හරි එහෙනම් ඉතින් ''සියල්ලට ප්‍රථම මනුස්සකම කියල '', හිතල ඔයාලත් මොනා හරි කරන්ට ඕනේ හරිද , මේ ඉන්නෙත් අපේ මිනිස්සු ......